ភ្នំពេញ៖ ចាប់ពីថ្ងៃទី០១ ខែមករា ឆ្នាំ២០២៤តទៅ រដ្ឋនឹងអនុវត្តពន្ធលើចំណេញមូលធន២០ភាគរយលើអ្នកដែលលក់អចលនទ្រព្យចំណេញ។ ការអនុវត្តក្នុងការប្រមូលពន្ធលើចំណេញមូលធននេះ បន្ទាប់ពីរាជរដ្ឋាភិបាលបានពន្យាពេលអនុវត្តរយៈពេល៣ឆ្នាំដោយសារវិបត្តិកូវីដ-១៩។
អគ្គនាយកនៃអគ្គនាយកដ្ឋានពន្ធដារ លោក គង់ វិបុល បានគូសបញ្ជាក់ឱ្យដឹងបែបនេះ នៅក្នុងកម្មវិធីផ្សាយផ្ទាល់ពិសេសនៅថ្ងៃទី១៥ ខែកញ្ញា ឆ្នាំ២០២៣ ស្តីពីការយល់ដឹងអំពីពន្ធដារ ដោយលោកអះអាងថា បើគ្មានអ្វីប្រែប្រួល រដ្ឋនឹងចាប់ផ្តើមអនុវត្តពន្ធលើចំណេញមូលធននៅដើមឆ្នាំ២០២៤។
លោក គង់ វិបុល បានបញ្ជាក់ថា ពលរដ្ឋដែលលក់អចលនទ្រព្យខាត ឬក៏ត្រឹមរួចខ្លួន គឺអត់ជាប់ពន្ធលើចំណេញមូលធន២០ភាគរយនោះទេ ពោលរដ្ឋប្រមូលពន្ធលើម្ចាស់អចលនទ្រព្យដែលលក់បានអចលនទ្រព្យដែលចំណេញតែប៉ុណ្ណោះ។
លោក គង់ វិបុល ថ្លែងថា៖«យើងខ្ញុំ(រដ្ឋ) យកតែ២០ភាគរយ បន្ទាប់ពីការកាត់កង ដែលរដ្ឋអនុញ្ញាតឱ្យកាត់កង៨០ភាគរយហើយ។
អគ្គនាយកនៃអគ្គនាយកដ្ឋានពន្ធដារ ពន្យល់ដូច្នេះថា៖«ច្បាប់ និងបទបញ្ញត្តិ បានអនុញ្ញាតថា ឥឡូវលក់១លាន(ដុល្លារ) កាត់កង៨០ម៉ឺន(ដុល្លារ)ចេញ ទុក២០ម៉ឺន(ដុល្លារ)គុណជាភាគរយទៅ វាស្មើនឹង៤ម៉ឺន(ដុល្លារ) អ៊ីចឹងលក់(ផ្ទះបាន)១លានដុល្លារ អ៊ីចឹងត្រូវបង់ពន្ធ៤ម៉ឺនដុល្លារ។ ការធ្វើនេះគឺស្លូតបូត ហើយសម្រួលមែនទែនសម្រាប់វិស័យអចលនទ្រព្យ និងបងប្អូនពលរដ្ឋរបស់យើង»។
បើតាមលោក គង់ វិបុល ការអនុវត្តពន្ធលើចំណេញមូលធននេះ គឺមិនប៉ះពាល់ដល់វិស័យអចលនទ្រព្យនៅកម្ពុជានោះទេ។ លោកបន្តថា នេះជាវិធានការមួយក្នុងចំណោមវិធានការដទៃទៀត ក្នុងការកៀរគរចំណូលពន្ធចូលរដ្ឋឱ្យសម្រេចតាមផែនការ ហើយក៏ជាគោលការណ៍នៃការពង្រឹងអនុលោមភាព និងភាពស្មើគ្នាក្នុងការបង់ពន្ធ៕